TOShKENT, 5 dek — Sputnik. Kelib chiqishi o‘zbekistonlik bo‘lgan taniqli Rossiya biznesmeni, milliarder Alisher Usmanov ilk bor O‘zbekiston hukumati bilan hamkorligi haqida aytib o‘tdi. "Reyter" agentligi xabariga asosan.
Biznesmen hozirgi rahbariyat amalga oshirayotgan moliyaviy islohotlarning dadilligini juda hurmat qilishini ma’lum qildi.
"Men aksariyat mamlakatlarda bo‘lgani kabi, bu 3-5 yil vaqt olsa kerak deb o‘ylagandim. Biroq bu yerda vaziyat bir yilda hal bo‘ldi", — dedi Alisher Usmonov.
Uning so‘zlariga ko‘ra, avvallari O‘zbekistonga sarmoya kiritishdan hamma cho‘chirdi, chunki daromadlar repatriatsiyasi mexanizmi yo‘q edi.
O‘zbekistonga qancha mablag‘ yo‘naltirmoqchi ekani haqidagi savolga Alisher Usmonov "Qo‘limdan kelganicha", deb javob berdi.
"Men qo‘limdan kelganicha O‘zbekistonga yordam berishga tayyorman va shunday qilyapman ham. Mening bugungi kundagi rolim — maslahatlashuvlar, konsalting va xayriya loyihalari".
Eslatib o‘tamiz, tez kunlarda O‘zbekistonda zamonaviy "Qadimiy Buxoro" sayyohlik majmuasini qurilish loyihasini amalga oshirish boshlanadi. Ushbu loyihada Alisher Usmonov ishtirok etadi.
