TOShKENT, 9 avg — Sputnik. So‘x tumani aholisi uchun Farg‘ona viloyatining 5 ta tumanlari hududida dehqonchilik qilish uchun ekin yer maydoni va ipoteka kreditlari asosida kvartiralar ajratiladi. Bu prezident qarorida ko‘zda tutilgan.
Yer viloyatning Yozyovon, Qo‘shtepa, Bag‘dod, Rishton va Buvayda tumanlari hududida ajratiladi.
So‘x tumani hokimiga Farg‘ona viloyati hokimligi bilan kelishgan holda 2022 yil 1-yanvarga qadar tumanni ijtimoiy-iqtisodiy rivojlantirish dasturiga kiritilgan loyihalar uchun, istisno tariqasida, sug‘oriladigan yer maydonlaridan tashqari yer uchastkalarini to‘g‘ridan-to‘g‘ri ajratish huquqi beriladi.
Farg‘ona viloyati hududida markazlashtirilgan mablag‘lar hisobidan amalga oshirilayotgan qurilish-ta’mirlash ishlariga, shuningdek, sanoat korxonalarida yangi tashkil etilayotgan ish o‘rinlariga So‘x tumani aholisini keng jalb qilish belgilangan.
Farg‘onadan So‘xga kichik aviatsiya transportida qatnov yo‘lga qo‘yiladi
Shuningdek, prezident tumanning ish bilan bandligi ta’minlanmagan aholisining bir qismini Toshkent shahrida yirik obyektlarda amalga oshirilayotgan qurilish-ta’mirlash ishlariga tizimli ravishda jalb qilish vazifasini topshirdi.
