TOShKENT, 10 dek - Sputnik. O‘zbekiston Gidrometeorologiya xizmati markazi ushbu hafta mamlakatda yog‘ingarchiliklar bilan kuzatilishini bashorat qilmoqda.
Turkmaniston hududidan 9-dekabr kuni nam va iliq havo oqimlari kirishi ta’sirida, Qoraqalpog‘iston va Xorazm viloyatining ayrim joylarida, Samarqand va Qashqadaryo viloyatlarida kechga borib kuchsiz yomg‘ir yog‘ishi mumkin. Shamol tezligi kuchayib sekundiga 15-20 metrga etishi kutilmoqda.
Keyinchalik respublikadagi ob-havoni Kavkazdan Kaspiy dengizi orqali O‘zbekiston tomonga siljigan balandlikdagi antisiklon belgilaydi. Respublikada 10-dekabrda yomg‘ir yog‘ib o‘tadi, shimolda yoqqan yomg‘ir qorga aylanishi mumkin.
Mamlakat hududining katta qismida harorat foni nisbatan iliq bo‘lib, kechasi 2-7 daraja, kunduzi 12-17 daraja iliqni tashkil qiladi, shimolda haroratning kechasi 3 daraja sovuqdan 2 daraja iliqqacha, kunduzi 3-8 daraja iliqqacha pasayishi kuzatiladi.
11 dekabrda Kavkaz hududidan sovuq havo kirishi bilan ayrim joylarda yog‘ingarchilik kuchayadi. 12-14 dekabrda ob-havoning nobarqarorligi saqlanadi, ayrim joylarda kuchsiz yog‘ingarchilik, mamlakatning shimoli-g‘arbiy tumanlarida ob-havo yog‘ingarchiliksiz bo‘ladi.
Sovuq antisiklon ta’sirida shu kunlarda havo harorati asta pasayib kechasi 0-3 daraja, kunduzi 8-11 darajagacha tushadi. Bu ko‘rsatkichlar o‘rtacha ko‘p yillik qiymatlarga yaqindir.
O‘tgan dam olish kunlari mamlakat aholisi tuman hodisasini kuzatdilar.
Tumanlarning davomiyligi har xil. Asosan 3 soatgacha davom etadigan tumanlar kuzatiladi. 12 soatdan ortiq davom etib, meteorologik ko‘rinuvchanlik 50 m va undan kam bo‘ladigan holatlar xavfli ob-havo hodisalariga kiradi. Bunday holatlar aviatsiya va yerusti yo‘l transporti uchun xavf tug‘diradi.
O‘tgan kunlarda aynan shunday sharoitlar kuzatildi. Esingizda bo‘lsa, dekabrning birinchi besh kunligida qishga xos bo‘lmagan quyoshli ob-havo kuzatildi, harorat 10-12 darajani tashkil qilib, tuproqning ilishiga isishiga keldi. 6-dekabrda esa Kaspiy dengizi tomondan kelgan antisiklon natijasida havo aynab, yog‘ingarchilik bo‘ldi. Harorat foni meyorlargacha tushdi.